تنبيه هام :

الإخوة الزوار الكرام ,
نوجه عنايتكم أنه تم نقل المدونة على العنوان الجديد :

بكامل مواضيعها و تعليقاتها ,
و قد تم إغلاق التعليقات في المدونة الحالية ,
كما أن المواضيع الجديدة سوف يتم نشرها على العنوان الجديد

لأن الاسم الحالي للمدونة و الذي يبدأ بالرقم 6 يثير بعض الشكوك حول المدونة
كما أنه يرمز إلى حرف "الطاء" و حرف الطاء في كلمة " تظبيط " هو في آخرها و ليس في أولها ,


يسعدنا أن نراكم هناك ...

و جزاكم الله خيرا

٣/٣١/٢٠٠٩

ـ جيفارا , جاب لنا المرارة !! ـ

السيدات و السادة ,

معكم ( سامي لماضة ) يحييكم و يرحب بكم في برنامجكم ( اسأل استشير )

و النهاردة معانا الأستاذ : ( سيد على نياته ) ,اللي عاوز يسألنا شوية أسئلة و استفسارات ,

اتفضل يا أستاذ ( سيد ) اسأل .. استشير ..

( سيد على نياته ) : أنا كنت نازل ( سوق الجمعة ) علشان أشتري تي شيرت جديد بمناسبة ( عيد الجربوع) ,
و عجبني تي شيرت مرسوم عليه راجل كده ما أعرفوش , فحبيت اسألكم عنه , و آدي الـتي شيرت :



( سامي لماضة ) : يااااه , ده انت على نياتك قوي يا أستاذ ( سيد ) ,
اللي على التي شيرت ده اسمه ( تشي جيفارا ) ,
و ده راجل ( شيوعي ) , يعني لا يؤمن بملة و لا بدين ,
من أمريكا الجنوبية , جنب كشك السجاير بتاع ( أم أليخاندرو ) ,


( سيد على نياته ) : طيب و احنا مالنا بيه الراجل ده ؟؟
يرسموه لينا على فانيلاتنا ليه ؟؟

( سامي لماضة ) : آه , أصل فيه شوية ناس ( بدلياتنا ) عاملينه بطل و ثوري و مثل أعلى و حاجات كده ,
علشان كان بيحارب في أمريكا الجنوبية في كام بلد كده ,
بس فيه ناس بتقول إنه كان لا ثوري و لا دياولوا , و إنه كان مجرد ( قاتل مأجور ) ,
بيحارب من أجل المال و الشهرة و خلاص

... و معانا مداخلة تليفونية ,
أيوة ..أيوة .. معانا ( الرفيق ) سمير ( أيسر ) ,
من مركز ( عَلْمَان ) - كَفْر ( الليبراوية ) ,



( سمير أيسر ) : إيه يا عم سامي ؟؟ ما تبطلوا بقى (تحشروا ) الدين في كل حاجة ,
مالنا احنا و مال جيفارا كان شيوعي و لا كافر ,
احنا لينا إنه قائد و ثوري و بيحارب لنصرة الضعفاء و القيم و الحق و العدل و ...
و بعدين بطلوا بقى تدخلوا الدين في كل حاجة ؟؟
انتوا أصلا عندكم وسواس اسمه الدين الدين الديـ ..... تيييت تيييت تيييت تيييت ,



( سامي لماضة ) : عفوا , الخط انقطع , عموما فكرتك وصلت يا ( رفيق ) سمير ,
و هنتصل بالأستاذ ( رزين محايد ) علشان يرد عليك بعيد عن الدين يا عم ,
أستاذ رزين , حضرتك معانا ؟؟



( رزين محايد ) : أيوة معاكم , و يسعدني إني أبين للأستاذ ( سيد على نياته ) و للرفيق ( سمير أيسر )
و كل المشاهدين حقيقة جيفارا بنظرة محايدة بدون أي دخول للدين في الموضوع ,
علشان أهالي كفر ( الليبراوية ) عندهم حساسية منه ,



و اسمحوا لي أتكلم باختصار علشان وقت البرنامج :



- V المفيد من أول هنااااااااااااااااا V -



- جيفارا اللي بيدعوا ( للقيم ) و يحارب من أجلها بيقول :
" انا لست مسيحاً، و لست محباً للاحسان ، انا كل ما يناقض المسيح ،
ومحبوا الاحسان يبدون عديمي القيمة بالمقارنة مع ما اؤمن به.
سأقاتل بكل الاسلحة التي بمتناول اليد بدلاً من ان ادع نفسي أدق على صليب او ماشابه " (1)

دي هي ( القيم ) اللي بيدعوا إليها
و لا بلاش دي , علشان الناس اللي عندهم حساسية من أي دين ,


------------------------------------


- جيفارا اللي بيدعو ( للعدل ) بيقول :
" لكي ترسل رجالاً الى فرقة الاعدام ، فالاثبات القضائي غير ضروري...
فهذه الاجراءات هي تفاصيل برجوازية قديمة." !!! (2)

فعلا .. الإثبات القضائي غير ضروري .. قشطة على العدل يا معلم !!


------------------------------------


- جيفارا بتاع ( الأخلاق و القيم ) بيقول :
"هذه ثورة، و الثوريون يجب ان يصبحوا آلات قتل باردة مدفوعة بالكره النقي ."(3)

آلات قتل باردة !! فعلا هو نجح أن يكون آلة قتل باردة !!


------------------------------------


- جيفارا اللي بيقاتل من أجل ( الفقراء ) و من أجل الغير و ( ليس المال ) بيقول :
" الوضع كان غير مريح بالسنبة للناس و بالنسبة لـ" ايتيمو" ,
انهيت المشكلة باعطاءه اطلاقه من مسدس عيار .32 على الجانب الايمن من دماغه. فلهث قليلاً ثم مات.
وحال مواصلتي ازالة ممتلكاته الشخصية، لم استطع انتزاع الساعة المربوطة بسلسلة الى حزامه.
عندها قال لي -رفيقه "إيتيموا" اللي كان خايف , مش القتيل- بصوت ثابت ابعد مايكون عن الخوف: انتزعها بقوة فما اهميتها ؟
فعلت ذلك وحاجياته الان ملكي " ! (4)

هو فعلا مش بيقاتل من أجل المال ,
لكن بيقاتل من أجل ( الساعة اللي في جيب الراجل )


------------------------------------


- جيفارا ( البطل , الشجاع ) لما قبضوا عليه كان بيقول :
" لاتطلق النار ! انا جي جيفارا ! انا اكثر قيمة لكم حياً مما ميتاً " ! (5)



و في النهاية أحب أقول إن اللي مش بيشوف من الغربال ... يروح يكشف نظر !!

اللي يتخذ من جيفارا قدوة و يترك :

- النبي - صلى الله عليه و سلم - الذي :
كان إذا احمر البأس و اشتدت الحرب كان الصحابة يحتمون به
قال علي رضي الله عنه: ( كنا إذا احمر البأس ولقي القوم القوم،
اتقينا برسول الله صلى الله عليه وسلم، فما يكون منا أحد أدنى من القوم منه ) رواه أحمد .

- حمزة بن أبي طالب :
الذي كان يقاتل بسيفين في كلتا يديه , و كان يقاتل كأنه الجمل الأورق ,
حتى قال عنه قاتله "وحشيّ" : ( والله إني لأنظر إلى حمزة يهد الناس بسيفه ما يبقي به شيئاً مثل الجمل الأورق )

- البراء بن مالك :
و الذي طلب من المسلمين أن يقذفوه داخل أحد الحصون بعد ما استعصى عليهم فتحه
و قال لهم : ( ارفعوني برماحكم فألقوني فيها ) ,
و فتح لهم الحصن من الداخل بعد أن جُرح أكثر من 80 جرحا !!

- خالد بن الوليد :
الذي ظن أعداؤه أن الله قد أنزل له سيفا من السماء يقاتل به !!

ييجي إيه جيفارا ده جنب اللي عملوه ‍‍؟؟!!

و غيرهم و غيرهم لكن احنا اختصرنا جدااااا
و مش عاوزين نطول علشان وقت البرنامج ,

فلا أدري ما ( الطفرة ) التي فعلها جيفارا و زادت على ما فعله المسلمون الأولون ,
كي يرتضيه بعض المسلمين رمزا و قدوة دون رسول الله و صحابته الكرام ؟؟

و أذكر نفسي و إياكم بقول رسول الله - صلى الله عليه و سلم - لأصحابه حين قال لهم :
(( المرء مع من أحب))
.
.
.
.
.
.
.


انزل بالتتر يابني , وقت الحلقة خلص من بدري ,

إعداد و إخراج :

TIMMY

.................................
ملحوظة :

أنا في هذا الموضوع لا أنكر ما قام به جيفارا من نضال ,
إنما أتحدث عن ( قَدْر ) هذا النضال
و عن ( الطريقة ) و ( المنهج ) الذي اتبعه في تحقيقه
و ( الغاية )
التي من أجلها فعل هذا ,
و أنه على الرغم من مآثره فإن مثالبه لا تخفى على بصير ,
و أنه لا يرقى بحالٍ لأن يكون قدوة , و لا حتى نصف قدوة ,
و لا حتى فتفوتة قدوة

..................................



لا تنسوا كاتب الموضوع الأصلي من دعوة صالحة
إن ربنا يتوب علينا و يهدينا و يوفقنا لما يحب و يرضى ..

و طبعا >> حقوق النشر للجميع <<
لو رأيت إنه يستحق النشر

بس ياريت تذكر رابط المدونة :

أو على الأقل تذكر إنه : :
" منقول
من مدونة تظبيط "
......................

تحيتي

....



ـــــــــــــــــــــــــــــــــــــــــــــــــــــــ
الاقتباسات كلها مأخوذة و مترجمة من ويكيكيوت , أحد مواقع ويكيبيديا من هذا الرابط :
http://en.wikiquote.org/wiki/Che_Guevara

(1)
" I am not Christ or a philanthropist, old lady, I am all the contrary of a Christ.... I fight for the things I believe in, with all the weapons at my disposal and try to leave the other man dead so that I don't get nailed to a cross or any other place."

Letter to his mother (July 15, 1956) as quoted in Che Guevara: A Revolutionary Life (1997) by Jon Lee Anderson ISBN 0802116000


(2)
" To send men to the firing squad, judicial proof is unnecessary. These procedures are an archaic bourgeois detail."

As quoted in The Cuban Revolution : Years of Promise (2005) by Teo A. Babun and Victor Andres Triay, p. 57

(3)

" This is a revolution! And a revolutionary must become a cold killing machine motivated by pure hate. "

As quoted in The Cuban Revolution : Years of Promise (2005) by Teo A. Babun and Victor Andres Triay, p. 57

(4)
" The situation was uncomfortable for the people and for [Eutimio], so I ended the problem giving him a shot with a .32 pistol in the right side of the brain, with exit orifice in the right temporal [lobe]. He gasped for a little while and was dead. Upon proceeding to remove his belongings I couldn't get off the watch tied by a chain to his belt, and then he told me in a steady voice farther away than fear: "Yank it off, boy, what does it matter." I did so and his possessions were now mine."

Diary entry from Sierra Maestra on the execution of Eutimio Guerra as an anti-revolutionary spy (January 1957), quoted in Che Guevara : A Revolutionary Life (1997) by Jon Lee Anderson

(5)
الاقتباس الوحيد من موقع آخر :
"Don't shoot, I'm worth more to you alive than dead."

http://www.urbandictionary.com/define.php?page=3&term=Che+Guevara
http://www.babalublog.com/archives/002368.html
http://www.freerepublic.com/focus/f-news/2178755/posts
"Don't shoot, I'm worth more to you alive than dead."



64 حط تعليقك:

موناليزا يقول...

الله يفتح عليك
اهو ده الكلام المظبوط

salma mohamed يقول...

بجد موتني من الضحك,
ظريف جدا البرنامج ده هو بيجي الساعة كام وعلى قناة ايه؟

الحكاية باختصار ان اعداء الاسلام بيحبوا يعظموا من رموز من امثالهم ويشغلوا بيها دماغ الشباب المسلم الغلبان وجاهل مش فاهم حاجه وماشي ورا الاعلام والموضه,
ربنا يهدي شبابنا ويعز الاسلام باهله,
وجزاك الله خيرا ونفع بك.

د/عرفه يقول...

بجد ربنا يبارك فيك
انا برضه كتير بستعجب من الناس اللى بتتأخذ الراجل ده قدوة لدرجة وضع صورته على التى شيرتات
ويعلقوا صورته على جدران الحائط
وكتير منهم حتى عمروا ما قرأ عن جيفارا ده كويس
مينفعش نسيب الرسول والصحابة
ونشوف سيرتهم ونقتدى بيها
ونتبع راجل زى ده
شكرا على الموضوع الجميل ده

TIMMY !! يقول...

موناليزا :

الله يفتح علينا و إياكِ ,

و ربنا يهدي الجميع , و أولهم احنا ,

جزاكِ الله خير

TIMMY !! يقول...

salma mohamed

شر البلية ما يضحك :)
و بصراحة لم أجد قالبا يصلح لاحتواء مثل هذا الموضوع غير القالب ده :)

العجيب في الأمر إن أعداء الإسلام نفسهم , و نفس اللي عملوا جيفارا ده بطل و صدروه لينا , هم هم كاتبين عليه في مواقعهم " الموثقة " الكلام اللي أنا ناقله ده !!

ربنا يهدينا و يهدي الجميع ,

جزانا و إياكم ,
و نفع الله بنا و بكم ,
جزاكم الله خيرا

TIMMY !! يقول...

د/ عرفة :

شكرا جزيلا على مرورك ,
و ربنا يبارك فينا و إياك ,

فعلا زي ما بتقول الواحد بيتحرق دمه لما يلاقيه على التيشيرتات و البوسترات ,
و الناس اللي بتحطه فئتين ,

إما بيحطوه علشان " بيقولوا عليه " ثوري و الكلام ده , و دي الفئة اللي أنا حاطط علشانها الموضوع ده ,

و فئة تانية ما تعرفش مين الراجل ده , و حاطاه علشان شكله حلو بالسيجار و الدقن ... استايل يعني :) !!

ربنا يهدينا و يهدي الجميع ,

و شكرا جزيلا على مرورك يا دكتور .

د. ياسر عمر عبد الفتاح يقول...

تسلم إيد يا هندزة
عين العقل وربنا
أصلاً تعالوا نشوف اليسارية ودتنا فين
ودتنا فى ديكتاتورية وديماغوجية وضحك على اللى من غير ذقون(زى ما بتحب)
كلهم فى الأول بيبقوا زعماء مناضلين رفقاء مكافحين من أجل الفقراء والمعدومين والحقوق والضعفاء .. وفى الأخر بيعيش فى روقان والشعب يبات تعبان
وبغض النظر عن جيفارا ونياته فهوه كان الى حد كبير مناضل فعلاً ورفض الوزارة فى كوبا وراح يناضل فى الكونغو مظنش إنه كان علشان المال لأنه أصلاً كان عنده ربو وعيان.
المهم يعنى مش هوه ده اللى يبقى مثل لينا
لأنه كان تابع لماكرس صاحب المذهب الشير
لا دين لا وحى لا أخلاق لا قيم
وكانوا بيتبعوا المبدأ الميكافيللى
الغاية تبرر الوسيلة

المهم بقى انت عامل ايه؟؟

مصطفى محمود يقول...

مهو يا عزيزي تيمي دا اللي بيحصل لما نبقى مغيبين عن ديننا تاريخنا !!

أنت عايز ايه من أمة مقهورة , وسبب قهرها أو جهلها بدينها وبتاريخ أجدادها ؟!!

محنا كل يوم بنسمع قول سيدنا عمر رضى الله عنه " نحن قوم أعزنا الله بالاسلام ...."

وبعدين ,,

احنا عندنا فوبيا من تاريخنا لأن اللي عاملين نفسهم بيفهموا شخصولنا ان سبب تخلفنا هو الدين الكخ دا , فحنا لازم نبعد عنه !!

لا حول ولا قوة إلا بالله

ربنا يهدينا والمسلمين يارب
آمين

تامر علي يقول...

المسألة مش جيفارا ولا مايكل جاكسون ولا ارنولد شوارزينجر ... المسألة في كلمة "التغريب" الذي صار مرادفاً للحضارة مهما حمل من "أوساخ" ...والبعد عن الدين ووصمه بالتخلف والرجعية مهما حمل من فضائل .

شكراً على المعلومات القيمة

MǿиY El-Shreef يقول...

انا صراحتن تن .. كنت شايفه انهم لما يلبسوا تيشيرتس عليها صورته او يرفعولوا كام تيفو وبنر ف المدرجات ده شئ عادي

كانوا بيقولولي ده راجل ثوري وبيدافع عن قضيه وكده

وماكنتش اعرف كل المصايب والبلاوي دي

يالهوي ياني .. مدفوعه بالكره الخالص

حسيت اني بقرا ادهم صبري تاني بس الي بيتكلم واحد من بتوع العلم الازرق ف ابيض :D

بس تعرف انا لما خلصت الموضوع وشفت سؤالك ايه الطفره .. لمحت في عقلي اجابه مفاجئة ,,

عارف

شكله اكيد حلو ع التيشيرت :D:D:D

هههههههههه

اسلوبك تحفه ياتيمي

والسمايلات بمووووت فيها

بس عندي بتعمل مربعات وبتكرهني ف نفسي >_<

تسلم ايدك ياسيدي

حسام غانم يقول...

موضوع رائع يا تيمي

بس برضه مع تحفظنا على حاجات كتير في جيفارا

إلا إنه يذكر له الاستراتيجيات اللي استخدمها

وإنه بث روح الثورة في أماكن كتير

هو مش قدوة كبني آدم

هو فقط رمز للثورة

SomeOne يقول...

مش حاجز اول تعليق كالعادة
والله وحشتني كتباتك
بغض النظر اني مكمنتش اعرف اصلان ان ده شخص معاين و لا عمري سمعت عنه
بس ربنا يكرمك
و نشكرك علي الأفادة
و ربنا يهدي الناس

مهندس مصري بيحب مصر يقول...

لو عملت بحث على مذكراته في النت و نزلتها و قريتها
حتلاقي أرنستو تشي جيفارا شارح بلاويه بالتفصيل
و هي موجودة بالعربي على فكرة
انت معاك حق
:)

أخـــ مسلمة ـــت يقول...

هههههههههههههههههههههههههه

والله مت من الضحك وخاصة الرفيق سمير أيسر ده
وأجمل حاجة "كفر اللبراوية"

عندك حق جدا جدا جدا

أعتقد انه عندنا في "ديننا" بالعند في الاستاذ ايسر نا يكفي

لو كل واحد فينا اقتدي بشخصية مختلفة عن الاخر
الشخصيات مش هتخلص
لانها ببساطة
"لا حصر لها أو لمواقفها"

بجد
تســــــــــــــــــــلم

:)

mohamed ghalia يقول...

الله عليك
تسلم إيدك
ياريت شبابنا يعقل

TIMMY !! يقول...

د. ياسر عمر عبد الفتاح

الله يسلمك يا دَكتَرة :)

عجبتني قوي حتة ( الضحك على اللي " من غير دقون " ) :)

و فعلا كلهم يبدأوا في دور النضال و الكلام ده , و بعدين يبصوا لمصلحتهم , و شوف كاسترو اللي كان معاه , أخد الدولة لحسابه , و بعدين لحساب أخوه

و جيفارا تلاقيه عجبه دور البطل فقال لك خلينا فيها ,

و شكرا جزيلا يا ياسر على الإضافات ( الميكافيللي ) :)

أناالحمد لله , و قريب قوي إن شاء الله هعمل الواجب اللي قلت لي عليه :)

بس ما تنساناش الله يكرمك من الدعاء , لأن الواحد " على الحركرك "

TIMMY !! يقول...

TeVa

عندك حق و الله يا مصطفى ,

انت عارف , الواحد بدأ في كتاب " الرحيق المختم " بتاع السيرة من كام أسبوع ,
بجد و الواحد بيقرأ بيحس إنه في عالم تاني خالص ,
و ناس أبطال بجد , تلاقي واحد يرمي نفسه وسط المشركين و واحد يدخل حصن اليهود لوحده علشان يقتل الراجل , ده غير اللي سيفه بيتكسر من كتر الضرب في المعركة !!

فعلا هو الجهل بالتاريخ أهم أسباب الحالة دي ,

ربنا يهدينا و يهدي الجميع ,

و ابقى طمنا عليك يا مصطفى ..

TIMMY !! يقول...

تامر علي :

أنا معاك فعلا إن المسألة مش مسألة جيفارا , لأنه مجرد رمز مستورد , رمز من عدة رموز يجري تصديرها لنا ,
كي ننسى رموزنا الأصلية و نستبدلها بما يريدون ,

و هو كما اختصرتَه في ( التغريب ) ,

جزاك الله خيرا أخي الكريم ..

TIMMY !! يقول...

MǿиY El-Shreef

بيني و بينك , أنا نفسي ما كنتش أعرف هو مين غير من كام سنة بس ,
الواحد لما بيدخل الكلية دماغة بتتطور برضه :)

و بالنسبة للتي شيرت فكلامك صح بجد ,فيه ناس بجد ما تعرفش الراجل ده مين , بس عاجبهم شعره المنكوش و السيجار اللي في بقه و خلاص :)

بالنسبة للإطار حول الابتسامات تقدري تشيليه بس لازم تكوني بتفهمي في الأكواد و الـxml

و شكرا جزيلا على المرور ..

TIMMY !! يقول...

حسام غانم :

شكرا جزيلا على كلامك ,
هو فعلا كان ليه مآثر لا أحد ينكر ذلك ,
لكن هذه المآثر التي فعل لا ترقى به لموضع القدوة ,

شكرا جزيلا على التنبيه يا حسام , و أنا عدلت في البوست علشان أضيف النقطة دي ,

TIMMY !! يقول...

SomeOne

ههههه , معلش , نسيت بجد احجر أول تعليق المرة دي :)

هو أنا برضه زمان ما كنتش أعرف الشخص ده ,
بس الحمد لله إني عرفته :)

شكرا جزيلا على المرور يا باشمهندسة ,
و الواحد مش عارف يعلق عندك علشان المدونة اتقفلت ,
و ياريت ما تبطليش كتابة و تكون فيه حتة تانية تقدري تفضفضي فيها لأن الفضفضة فعلا بتريح الواحد ,

شكرا جزيلا لمرورك ..

TIMMY !! يقول...

مهندس مصري

أهلا و سهلا بيك يا باشمهندس ,
أنا فعلا و أنا بعد للموضوع لقيت مذكرات جيفارا ,
بس لقيت ناس " من إياهم " بيشككوا فيها و يقولوا إيش عرفكم إنها بتاعة جيفارا ؟؟

فقلت أكتفي بالكام اقتباس من ويكيبيديا دول و خلاص ,

ربنا يهديني و يهدي الجيمع ,
و يرجعك بالسلامة يا باشمهندس و تلحق زيزو قبل ما يدخل الجيش :)

TIMMY !! يقول...

أخـــ مسلمة ـــت

فعلا في ديننا مندوحة عن رجيع الشرق و بزاق الغرب الذي ينقلوه لنا !!

و كمان عندنا تنوع في القدوة ,
عندنا قدوة في الصبر و قدوة في القتال و التخطيط , و قدوة في القوة و ....

و قد جمع رسول الله صلى الله عله و سلم ذلك كله .... لو كانوا يعلمون !!

جزاكِ الله خيرا ,
و ربنا ينفعنا و ينفع غيرنا بما نكتب

TIMMY !! يقول...

mohamed ghalia

شكرا جزيلا لمرورك يا محمد ,

و ربنا يهدينا و يهدي الجميع ,
و يوفقنا لما يحب و يرضى ..

اوركيديا يقول...

هههههههههه
اسلوب تحفه فعلا و انا من الناس اللى متابعه المدونه دى من زمان عرفتها من ابن مصر بس اول مره اعلق على حاجه
المهم
على موضوع جيفارا انا كنت عارفاه كاسم و بطل قومى فى كوبا و حرر بلاد كتير و كافح كتير
و كمان قريب قريتله قصه بتاعت تشى جيفارا لاحمد خالد توفيق
مطلعه فيها بطل فعلا
مش عارفه
بس انا حبقى احاول ادور تانى و اقرى المصادر اللى حضرتك جبتها دى

مره تانى المدونه دى فعلا من اجمل المدونات اللى شوفتها

فى رعايه الله

wesoooooooooo يقول...

السلام عليكم
بص هو احنا دايما اللى بندى المواضيع أكتر من حجمها وجيفارا ده أكبر مثل على كده
ومعظم الشباب اللى بيلبسوا تى شيرتات عليها صوره اوحتى بيعلقول صوره على الحيطه ماشين على الموضه مش اكتر
بس طريقة عرضك للموضوع أكثر من رائع
فتح الله عليك أخى الكريم
تحياتى

Unknown يقول...

قولى بقا ان دا راجل مش تمام

اصل بشوف حسن حنفى حاطط صورته على طول كدا

بس بجد شكرا ع المعلومات تبقى تسال ها

غير معرف يقول...

هو مين جيفارا ده ؟؟؟

ههههههههههههههه

بجد تسلم يا تيمي على الفكرة الجميلة دي

أنا شخصيا لسا عارف بسلامته من وقت قريب جدا

ومشعارف ليه الناس مهووسة بيه للدرجادي

ده ولا كأنه رئيس مراجيح مولد النبي

ههههههههههههههه

جزاك الله كل خير

وربنا يهدينا جميعا

حسن حنفى يقول...

" لكي ترسل رجالاً الى فرقة الاعدام ، فالاثبات القضائي غير ضروري...
فهذه الاجراءات هي تفاصيل برجوازية قديمة." !!!

هقولك علي رأي في دي

انا شايف ان جيفارا مش كان اصلا موقفهم يمسح ليهم انهم يعملوا هيئه قضايئه علشان يحاكوا كل واحد ويحكموا عليه بالاعدام كمان اصلا هم مش كان ينفع يعملوا حكم غير الاعدام يعني مش كان عندهم سجن يحكموا فيه بالحبس والفتره اللي كانوا فيها مش كانت بتسمح ليهم انهم يسيبوا حد علشان كده كانت معظم الاحكام بالاعدام وده اللي جيفارا قاله في مذاكراته

..................
"هذه ثورة، و الثوريون يجب ان يصبحوا آلات قتل باردة مدفوعة بالكره النقي ."

تصور كده واحد بيحاول يعمل انقلاب مسلح في بلد وداخل علي قتال وقدامه واحد لازم يقتله وقلبه مش بارد زي ما جيفارا بيقول وخاف يقتله او قلبه دق وهو بيقتله او شاف واحد من غير رجل وشاف صاحبه اللي جنبه بيموت وعينه بتطلع وقلبه مش ميت هيعمل ايه ؟
ثانيا : لو مش بيكرهوا الجيش باتسيتي وجنوده كلهم ازاي هيقدروا يقتلوهم من غير رحمه ده غير ان مش حد يقدر ينكر انهم بين بعضهم كانوا بيحترموا بعضهم لاكبر تقدير

...............

بالنسبه لحكايه ان جيفارا كان بيحارب علشان المال اولا في الموقف اللي انت كاتبه هو واخد الحاجه دي من عدو ليه مش من صديق يعني حقه انه يحتفظ بالحاجه دي ثانيا مش حد يقدر ينكر ان جيقارا خاد الجنسيه الكوبيه وكان يقدر يكمل في كوبا ومعاه كل المال اللي بيحلم بيه والفلوس اللي يتمناها مش محتاج يروح بوليفيا ويموت فيها ولا ايه ؟
ده غير انه مش ساب لعيلته اي حاجه في كوبا ومش ساب ليها اي املاك وكان وزير ومع ذلك بينزل يشتغل مع العامه
..................

جيفارا مش كان ضعيف ابدا وعمره ماكان جبان والا علي الاقل كان هيكمل في كوبا مش هيروح يموت نفسه في بوليفيا
وكان كتير جداا بينصحه انه يهدي من رتم حياته شويه لانه لسه صغير واولهم عبد الناصر اما زاره في مصر

............
جيفارا مش كان بيكره في حياته زي الرأسماليه اللي بيقتلوه تاني بيها وهو ميت بالسلع اللي عليها صوره

........

اسف علي الاطاله

جزاكم الله خيرا

رحلتنا في الحياة يقول...

البوست جميل اوى من اسبوعين عايز اعمل بوست نفس الفكرة بس انت عملته بطريقة اجمل ما تكون تسلم ايديك
اسمحلى انزل البوست فى المدونة عندى واكيد طبعا هقول انى قريته هنا

حياتى نغم يقول...

السلام عليكم / ربنا يتوب علينا وعليك ويهدينا ويهديك ويوفقنا وإياك لما يحب ويرضى آمين .
جزاكَ الله عنا كل خير وربنا يهدى شباب المسلمين لما يحب ويرضى آمين .
تبهرنى موضاعاتك حقاً باركَ الله فيك آمين .
شوفت دعوات كتير :) ربنا يتقبل . دمت بخير أخى .

Unknown يقول...

هم أناس يبحثون عن مثل وقدوة
غير ذات جهد فى اتباعها
بمعنى قدوة لن تطلب
منك الاستقامة!
ولا الصوم!
ولا الصلاة!
بردون يعنى حاجة ببلاش كده:(

Unknown يقول...

تعلم ان مثل هذا الكلام
قيل من قبل عن(أدهم الشرقاوى)
وقامت الدنيا ولم تقعد على من قالها
الناس بستسهل الاتباع عن التفكير
فى حقيقة المتبع.

Unknown يقول...

ربنا يفتح عليك
من قلبى بقولها لك
يفتح عليك بالخير انت
وشباب المسلمين أجمعين
ويبعد عنكم شياطين
الانس والجان.
امين.

TIMMY !! يقول...

اوركيديا

أهلا بيكي في المدونة في اول تعليق ,
و شكرا جزيلا على المتابعات السابقة :)

و بالنسبة للقصص اللي قرأتيها , فالإعلام يقدر يخلي أي واحد بطل بسهولة جدا , حتى لو كان بطل مزيف ,

و عموما المصادر قدام حضرتك , و ابحثي و قولي لنا ,

و أنا مش بنكر إن جيفارا كان مناضل ,
أنا بقول إنه ما ينفعش يكون قدوة ,

تحيتي :)

TIMMY !! يقول...

wesoooooooooo

و عليكم السلام و رحمة الله ,
و أنا معاكي إن في ظل غياب القجدوة فالناس بتدور على أي حاجة تعملها قدوة , حتى لو الحاجة دي مش قد المقام :)

عموما ربنا يهدينا و يهدي الجميع ,
و شكرا جزيلا للمرور ,
جزاكم الله خيرا

TIMMY !! يقول...

المبرمج المحترف :

يا هلا فيك يا عمر :)

عفوا على المعلومات يا عمر :)

و ربنا يوفقك في مذاكرتك و الحاجات التانية :)

TIMMY !! يقول...

سمو الأمير :

على رأيك يا أحمد ,

بس انت عارف , " الهيبة يا باشا " :) عامله شغل برضه ,
الشعر و السيجار عاملين له منظر :)

جزانا و إياكم يا أحمد ,
و ربنا ينفعنا و ينفع غيرنا بما نقول ,

TIMMY !! يقول...

حسن حنفي ,
أهلا بي كيا حسن , و يسعدني جدا التعليقات اللي فيها نقاش :)

-------------
انا شايف ان جيفارا مش كان اصلا موقفهم يمسح ليهم انهم يعملوا هيئه قضايئه علشان يحاكوا كل واحد ويحكموا عليه بالاعدام كمان اصلا هم مش كان ينفع يعملوا حكم غير الاعدام يعني مش كان عندهم سجن يحكموا فيه بالحبس والفتره اللي كانوا فيها مش كانت بتسمح ليهم انهم يسيبوا حد علشان كده كانت معظم الاحكام بالاعدام وده اللي جيفارا قاله في مذاكراته
-------------

طيب و هو ده من العدل برضه يا حسن ؟؟
إنه يحكم من غير محاكمة ؟؟
أو إنه يبقى عنده حكم واحد بالإعدام بس ؟؟

عموما هو و ظروفه ,
لكن اللي بيعمله ده كان لا يتفق مع الإسلام , عندنا : خير للحاكم أن يخطيء بالعفو من أن يُخطيء بالعقوبة ,


----------

تصور كده واحد بيحاول يعمل انقلاب مسلح في بلد وداخل علي قتال وقدامه واحد لازم يقتله وقلبه مش بارد زي ما جيفارا بيقول وخاف يقتله او قلبه دق وهو بيقتله او شاف واحد من غير رجل وشاف صاحبه اللي جنبه بيموت وعينه بتطلع وقلبه مش ميت هيعمل ايه ؟
ثانيا : لو مش بيكرهوا الجيش باتسيتي وجنوده كلهم ازاي هيقدروا يقتلوهم من غير رحمه ده غير ان مش حد يقدر ينكر انهم بين بعضهم كانوا بيحترموا بعضهم لاكبر تقدير
--------------

بالنسبة لدي فالثورة عندهم يختلف أحكامها عننا ,
و الخروج على الحاكم و قتاله ليه شروط و أحكام برضه , و طبعا جيفارا مش كان بيتبع الشريعة خالص لأنه أصلا مش على دين !!


----------------
جيفارا مش كان ضعيف ابدا وعمره ماكان جبان والا علي الاقل كان هيكمل في كوبا مش هيروح يموت نفسه في بوليفيا
وكان كتير جداا بينصحه انه يهدي من رتم حياته شويه لانه لسه صغير واولهم عبد الناصر اما زاره في مصر
----------------

عموما دي الكلمات اللي وصلت لي على لسانة !!
و من المصادر اللي ذكرتها ,



و بعيد عن الحاجات اللي أنا جايبها كلها يا حسن ,
أنا مش بنكر إن جيفارا كان مناضل و لا حارب في أكثر من بلد و لا الحاجات دي ,
اللي أنا عاوز أوصل له في الموضوع ده إن جيفارا كان بشر , مش من جلدتنا و لا بيتبع تعاليمنا ,
و كان بيعمل حاجات تخالف الشريعة بتاعتنا ,
و حتى محصلة الحاجات اللي عملها - الحلوة و الوحشة - لا تجعله بطل نقتدي به و نعلق صوره ,

بل هو كان بشر , عمل حاجات حلوة , لكن بطرقة وحشة , و الغاية لا تبرر الوسيلة ,

و حتى لو الغاية بررت الوسيلة فالحاجات الحلوة اللي عملها ما تجيش حاجة إذا ما قورنت بالحاجات اللي أجدادنا المسلمين الأوائل عملوها ,
فأيهما أولى بالاقتداء ؟؟

TIMMY !! يقول...

أيوشة :

شكرا جزيلا للمرور ,

و البوست طبعا متاح للجميع ,
ده شيء يشرفني إنه ينتشر و يتوغل و يقتل :)

شكرا جزيلا لمرورك ..

TIMMY !! يقول...

حياتي نغم :

و عليكم السلام و رحمة الله و بركاته

آآآآآآمين
ربنا يستجيب ,
و يارب كل الناس تكون بتدعي , و ربنا يستجيب إن شاء الله
و ربنا ينفعنا بما نكتب ,
جزاكم الله خيرا
و شكرا جزيلا على المرور و تصفح المواضيع :)

TIMMY !! يقول...

د. نور :

معاكي حق و الله يا دكتورة ,
أهو مثل أعلى مش محتاج مجهود ,
مجرد صورة على الفانيلة و لا وبستر في الأوضة !!

و بالنسبة للإعلام , فالإعلام بتاعنا اللي ماسكة مسوخ العلمانيين اللي عاوزين يحطوا أي رؤوس بعيد عن الدين علشان يلهوا الناس فيها ,

و ربنا يستجيب لدعائك يا دكتورة ,
آآآآآآآآمين , عاجلا غير آجل إن شاء الله ,
جزاكِ الله خيرا بجد ,
مرورك بيسعدنا دائما :)

د.توكل مسعود يقول...

السلام عليكم ورحمة الله... وبعد

فنشكرك على إبداعاتك... وتميزك...

كما أشكرك على زيارة مدونتى وتعليقك ودعائك... نفع الله بك

ghorBty يقول...

السلام عليكم

ما شاء الله

بجد اسلوب رااااائع لتوصيل الفكره الصحيحه

ربنا يبارك لك ويجعله في ميزانك يارب

فيه كتير بيقلد وبس من غير ما يرجع ويقرا او حتي يسال هو ايه دا ومين وعمل ايه ربنا يهدي الجميع ويردنا الي الصواب دائما

بوركتم

غير معرف يقول...

دخلت اطمن عليك و أسأل عنك و اخبارك دا اولا فلقيتك منزل موضوع

فان شاء الله راح ارجع تانى اقرأيمكن ساعتها برضه اطمن انك بخير ^^

"أم أدهم المصرية" يقول...

السلام عليكم ورحمه الله وبركاته

والله ياتيمى الجهل نعمه
فى ناس مسمعتش عنه اصلا على قدالهوجه اللى عليه دى على قد ما فى ناس مش فى دمغها اصلا

بس نرجع ونقول اللى ميعرفش يعرف
وتسلم على تصحيح المعلومات للناس

الله المستعان

برنامج جميل ياريت تكمله
----------------------------------

حسام غانم يقول...

السلام عليكم

ازيك يا تيمي

ليك تاج عندي

شموخ مسلمة يقول...

اولا بجد انا بحييك جداااااااا جدااااا على مدونتك انا متابعاها من فترة و عاجبانى جداااااااوعاجبنى اسلوبك اوى
ربنا يكرمك يارب

بالنسبة للموضوع
ده المشكلة الرئيسية كمان حاجة
فى ناس فعلا فعلا مايعرفوش مين اللى على التى شيرت ده مع انهم بيدورو ع التى شيرت ولازم يلاقوه
بقت حاجة شبه اساسية فينا التقليد الاعمى
تقليدو تقليدو بس بدون اى فهم لاى حاجة
واللى يعارضهم يبقى انسان مش مثقف وجاهل و كمان لو اتكلم فى الدين زى ما ذكرت و الله ممكن يطلعوه ارهابى فى الاخر
ياللا ربنا يهدى
بجد جزاك الله كل خير ع الموضوع و ع المدونة

زوزو يقول...

مش معقول
من غير مجامله مدونه فظيعه وانا مالاخر مدب يعني مش بعرف اجامل حد تصفحتها عالسريع السريع وعجبتني وحاطيتها بالمفضله عندي وعجبني انك بتقول عن نفسك انك مش قدوه ولا بتاع دا كلام انا واللهي دايما بقوله عن نفسي هتشوف ردودكي كتير وهتزهق اكيد بس مش مهم كانت معك زوزو

MǿиY El-Shreef يقول...

تيميىىىىىىىىى

ليك تاج عندي تعالى استلم

TIMMY !! يقول...

د.توكل مسعود

و عليكم السلام و رحمة الله و بركاته ,
و حمد الله بالسلامه يا دكتور ,
و الله فرحت كتير لما عرفت خبر الإفراج ,
و عودتك للتدوين مره أخر بالسلامة :)

نفع الله بنا و إياك ,
و شكرا جزيلا على الزيارة الغالية ,

TIMMY !! يقول...

ghorBty

و عليكم السلام و رحمة الله ,
ربنا ينفعنا بما نقول ,


فعلا الأغلبية مقلدة عن جهل ,
و الأقلية مقلدة عن " جهل مركب " !!

ربنا يهدينا و يهدي الجيمع ,

و شكرا جزيلا على المرور ..

TIMMY !! يقول...

أحمد عمر

و الله بتحرجني بذوقك ,
و رغم إن مدونتك من المدونات اللي بتعجبني جدا , لكن اعذرني على عدم المتابعة :(

شكرا جزيلا لمرورك الكريم ,
و إن شاء الله هتابك مدونة حضرتك أول بأول :)

TIMMY !! يقول...

لؤلؤةالرحمن .....هويتى اسلاميه

و عليكم السلام و رحمة الله و بركاته

هو فعلا فيه ناس ما سمعتش عنه ,
و الواحد خايف أحسن يكون بيعمل دعاية ليه !!
بس أهي هتكون دعاية سلبية للي ما يسمعش عنه , و هتبقى " محاولة " لتصحيح أفكار من يسمع عنه ,

ربنا يهدينا و يهدي الجميع ..

TIMMY !! يقول...

حسام غانم

و عليكم السلام ,
و شكرا جزيلا على التاج ,
و إن شاء الله أحله لما يحين الوقت :)

تحيتي

TIMMY !! يقول...

أمل الحياة

شكرا جزيلا على التحية ,
و على المتابعة , و الحمد لله إن مواضيع المدونة كانت ذات فائدة ,
جزانا و إياكم

بالنسبة لجيفارا , فعندك حق ,
فيه ناس بجد بتحب تقلد و خلاص ,
و بتحس بنشوة عظيمة لما يحسوا إنهم عاملين زي فلان أو علان !!

ربنا يهدينا و يهدي الجميع ,

و جزاكِ الله خيرا على المرور و المتابعة ..

TIMMY !! يقول...

زوزو :

شكرا جزيلا على التعليق التلقائي اللي أسعدني بجد :)
و يارب تكون المواضيع فعلا بتفيد الناس ,

و إن شاء الله تتابعينا على طول ,
و ما تخافيش مش بزهق من التعليقات :)

TIMMY !! يقول...

MǿиY El-Shreef

ياااااااه , تاني تاج :)

شكرا جزيلا على تمريره

و إن شاء الله هحله لما تيجي فرصة إن شاء الله

ست البنات يقول...

salamu alikom Timmy
ana leh kol ma ad7'ol a7ess enny katabt comment o mesh bla2eeh !!!! 7'eer isA
MSA nice article rabena yekremak\
:)

زوزو يقول...

شو يا عم تيمي فكرتني باستاذ العربي الواد الصايع خريج جديد لما جاه يدرس لينا في ثانويه عامه فعلا كان شبه الي ما يتسماش ولابس تي شيرت عليها صورته ومربي شعره تقولش ابنه وكل شويه يمدح فيه اه بس لو الزمن يرجع كنت عملته فرجه مدارس اخر زمن حتى الاستاذ فيها بيدي حاجات غلط ومعلومات كتير غلط بس الحمد الله الواحد بيكبر وبيحاول يصلح الفساد الي عشش في دماغنا من المناهج العقيمه والكادر التعليمي الي معظمه فاشل علمتني اكتب زيك كدا كلام كتير عشان ازهقك :) تسلم ايدك
زوزو

TIMMY !! يقول...

ست البنات ,

و عليكم السلام يا دكتورة ,
و معلش , تلاقي العيب من جهازك و لا حاجة ,
شكله كمان مش بيكتب عربي :) ,
خير إن شاء الله

ربنا يكرمنا و إياكِ ,
و يهدينا و يهدي الجميع
و شكرا جزيلا لمرورك

TIMMY !! يقول...

زوزو ,

فعلا مدرس العربي اللي كان على أيامكم ده كان عندنا منه كتير برضه
ده بيبقى نتيجة الجهل و التقليد ,
ربنا يهدينا و يهدي الجميع ,

و للأسف مش بتبقى أخطاء مدرسين بس , دي بتبقى أخطاء مناهج كمان ,
و الله أعلم إن كانت حقا " أخطاء " أم أنها " متعمدة " !! ؟؟

سلمكِ الله ,
و شكرا جزيلا لمرورك ,
في أمان الله

hasona يقول...

السلام عليكم

ههههههههههه
ليه كده بهدلت الناس يا كبير

TIMMY !! يقول...

hasona

و عليكم السلام و رحمة الله ,

معلش بقى يا حسام ,

الراجل متبهدل طبيعي :) نعمل له إيه ..

حقوق النشر للجميع


لا تنسوا كاتب الموضوع الأصلي من دعوة صالحة
إن ربنا يتوب علينا و يهدينا و يوفقنا لما يحب و يرضى ..

و طبعا >> حقوق النشر للجميع <<
لو رأيت إنه يستحق النشر
بشرط عدم التبديل أو التغيير

و يا حبذا أن تذكر رابط المدونة :

أو على الأقل تذكر إنه :
" منقول
من مدونة تظبيط "
......................

تحيتي

....