ابتسم زي العبيط ... و كله هيتظبط تظبيط !!

عمرك رحت للدكتور و كنت تعبان و بعد ما خلص كشف
راح ( حاطط إيده على كتفك ) و قال لك :
يابني انت سليم , ما عندكش حاجة عضوية ,
الألم اللي عندك ده ( نفسي ) !!
تا تا تا تااااااااااااا

عموما لو ما حصلكش , فيه ناس تانية حصل لهم

المهم يعني , عمرك سمعت عن مرض عضوي كان أصله نفسي ؟؟ (*)
أكيد سمعت ..

طيب عمرك سمعت عن العكس ؟؟

إن وضعك العضوي ,المادي , الملموس ممكن يأثر على حالتك النفسية ؟؟

طبعا هتقول لي : إزاي ؟؟


هقول لك يا سيدي :

ارجع بالكرسي اللي انت عليه لورا شوية ..
اثني ظهرك ..
ضع كوعك على رجلك ..
ضع خدك على إيدك ..
انظر للأرض ..

هاه .. حاسس بإيه دلوقتي ؟؟

أكيد افتكرت موقف وحش ,
أو مشكلة قديمة ( هفّت عليك ) ,
أو جالك إحساس وحش أو .... إلخ,

صح ؟؟


طيب دلوقتي نجرب حاجة تانية ,

رجع ظهرك لورا ,
افرد ظهرك ,
انظر لأعلى بزاوية 45 - و ما تسألش ليه - ,
ارسم ابتسامة عريضة بشفايفك ... ياعم ارسمها و خلاص ,

هاه , جاهز ؟؟

دلوقتي افتكر أي موقف وحش في حياة جنابك الكئيبة ...

لا لا , سيب الوضع و الابتسامة و كل حاجة زي ما هي,

.
.
.

العملية مش نافعة , صح ؟؟

لييييييييييييييه ؟؟


لأن جسمك في وضع ( إيجابي ) ,
يعني في الوضع اللي عادة بيكون فيه بيفكر فيه تفكير إيجابي ,
فمش قادر يفكر تفكير سلبي ,



علشان كده هيئتك و وضعك المادي المحسوس ده ممكن جدا يأثر في حالتك النفسية ,

و فيه مقوله عاجباني جدا للإمام الشافعي بيقول فيها :
( من نظف ثوبه قلَّ همّه , و من طاب ريحه زاد عقله ) (**) ,

تخيل نفسك كده ( واخد دُش ) و لابس (الحتة اللي على الحبل) و الهدوم مكوية و نظيفة و آخر تمام , و حاطط ريحة - للصبيان بس - و آخر جمال ,


تخيل نفسك في الوضع ده و شوف تفكيرك و تعاملك و حياتك هتكون إزاي ؟؟

و تخيل نفسك العكس برضه ,

أكيد أكيد وضع جسمك و هدومك و جلستك و مشيتك و ..... إلخ ,
كل الحاجات دي بتأثر على حالتك النفسية و على ( دماغ جنابك العالي ) ,


علشان كد لما تلاقي نفسك داخل على نوبة اكتئاب و لا حاجة ,
لازم ( تلبي نداء الطشت ) و تقوم تستحمى ,
و تلبس نظيف و تسرح شعرك و تحط ريحة و تظبط نفسك كده ,

أو على الأقل تعدل من طريقة جلوسك و تبص للسقف و تبتسم زي العبيط كده , و كله هيتظبط تظبيط ,


بس خلاص , رجّع ظهرك لورا و إلزق ابتسامه على وشك ,
و شوف إن كنت هتعلّق و لا هتقفل , و لا شوف انت رايح فين بالظبط .

سلام


و لا تنسوا كاتب الموضوع الأصلي -اللي هو أنا طالما الموضوع في المدونة- من دعوة صالحة
إن ربنا يتوب علينا و يهدينا و يوفقنا لما يحب و يرضى ..

و طبعا >> حقوق النشر للجميع <<

لو رأيت إنه يستحق النشر

و ياريت تذكر رابط المدونة :

6azbeet.blogspot.com

أو على الأقل تذكر إنه : :
" منقول من مدونة تظبيط "

......................

تحيتي

.....

ــــــــــــــــــــــــــــــــــــــــــــــــــــــــــــــــ

(*) و فيه آلام عضوية أصلها نفسي ,
على ما أذكر زي حاجة اسمها (hysterical globes) إنك بتحس بحاجة واقفة في زورك

(**) ملحوظة بره الكلام :

كان فيه كلام لابن تيمية - رحمه الله - عن إن اللي بيلبس زي العسكر بيتصرف زيهم و اللي بيلبس زي معين و هيئة معينة بيتصرف زي أهلها ,
ياريت لو حد عارفه أو عارف حتى جملة منه يقولها لي علشان أضيفها ,